CELEBRACIÓN LETRAS GALEGAS 2023

Éranse uns trasnos que pretendían que o galego desaparecera

e un cole que usaba a lingua galega para que non se perdera..

O Cole Pombal de Vigo promovía o galego para que o idioma seguira vivo malia os trasnos que querían velo desparecido.

Fonte: Faro de Vigo

Celebraban o Día das Letras Galegas polo libro de Rosalía,

que volveu facer do galego unha lingua viva.  

Preme para ler "Cantares Gallegos"

Para que os trasnos non puideran co galego rematar,

no Pombal o Día das Letras Galegas comezaron a preparar.

Este ano lémbrase a Francisco Fernández del Riego,

quen fundou a Editorial Galaxia e fixo moito polo galego.

Profesorado e alumnado crearon un precioso mural

comparando a Fernández del Riego co que fan no Pombal.

Preme para abrir o collage

As clases fixeron investigacións e exposicións,

Ata un experto , Ramón Nicolás, viu ao cole facer unha presentación,

culminando no patio con brillantes actuacións.

Dúas compañeiras de 4º

A mestra Angélica presenta a celebración no patio

Alumnado de 6º actuando

Para salvar o galego dos trasnos outro ano,

organizouse no Pombal un gran meigallo:

unha gran foliada no patio para os trasnos espantar

e da música galega poder gozar

que nos vídeos de abaixo podes visualizar!

MATERIAL PARA AS LETRAS GALEGAS 2023

Este ano a Real Academia Galega escolleu a Francisco Fernández del Riego como autor homenaxeado no Día das Letras Galegas, unha figura moi activa a prol da lingua e do país que fundou a Editorial Galaxia.

A RAG editou unha serie de vídeos coa súa biografía que podedes visitar premendo a imaxe. 

Como é habitual, tamén o Seminario Galán oferta unha escolma de actividades variadas e divertidas que podes visitar premendo na imaxe.

CELEBRAMOS OS MAIOS 2023!

Neste mes de maio toda Galicia celebra a festividade dos Maios, que data de tempos prerromanos e coa que se conmemora a chegada da primavera. Tradicionalmente pídense boas colleitas adornando as 

vilas con estruturas florais e organizando romarías e bailes populares.

No Pombal sumámonos a esta celebración como podedes ver nas imaxes inferiores. Se queredes máis información sobre as celebracións en Vigo, que se organizan este domingo 14 de maio, velaquí a nova do Atlántico Diario.

O GALEGO ESTIVO PRESENTE NOS APADRIÑAMENTOS LECTORES

Por iniciativa da Biblioteca, no Pombal recuperamos a tradición de festexar o Día do Libro coa actividade dos "Apadriñamentos lectores", consistente en que a rapazada maior prepare e lea un libro a un dos cativos/as do centro.

Son moitos os valores que sementamos así, como o fomento da lectura, o sentido de pertenza á comunidade e, sobre todo, o exercicio da responsabilidade das madriñas e padriños.

Houbo lecturas para todos os gustos: contos clásicos, cómics, de aventuras, de princesas e tamén houbo lecturas en galego, das que deixamos unha mostra. Proximamente haberá máis fotos no blog da Biblio.

Parabéns a todo o alumnado e profesorado polo éxito da actividade!

FEBREIRO, UN MES DE MOITO GALEGO!

O mes de febreiro foi moi intenso no tocante a actividades relacionadas coa lingua galega.
Sendo o mes do Entroido, traballamos receitas típicas desta festividade tan nosa e recuperamos o tradicional pasarrúas pola zona peonil do Calvario. Alén diso, sumámonos á celebración do Día de Rosalía de Castro.

Velaquí algúns exemplos das actividades.

RECEITAS DE ENTROIDO

Grazas á participación e implicación do alumnado e familias levamos a cabo esta actividade, coa que pretendimos coñecer costumes e tradicións gastronómicas do Entroido das distintas comunidades e países.

Con todas as achegas creamos o libro "Receitas de Entroido" que está á vosa disposición na biblioteca do centro. Velaquí algúns exemplos:

DÍA DE ROSALÍA DE CASTRO

O 23 de febreiro celebramos o Día de Rosalía de Castro. Aproveitamos a ocasión para coñecer a súa vida e disfrutar da súa obra facendo distintas actividades como retratala, recoller palabras que nos lembrasen a ela e ata a vestimos cos seus versos. Adiante exemplos!

ENTROIDO 2023

Outro ano máis chega o Entroido!

A temática versará sobre o proxecto que estamos a traballar no cole: "Sementando futuro no Pombal".

O Meco xa deu as ordes e as clases están a preparar os disfraces e complementos para saír ao pasarrúas pola zona peonil do Calvario este venres 17, ao que convidamos ás familias.

Neste folleto tedes toda a información sobre esta festividade tan nosa e tan divertida!

DÍA DA PAZ 2023

Outro ano máis os corredores do Pombal comezan a encherse de motivos pola paz e nas diferentes materias trabállase esta data tan especial coa que pretendemos sementar un futuro de paz, sen guerras nin violencia, para o que a educación e a escola son clave. 

Deixámosvos un vídeo moi didáctico e bonito que conta en galego a orixe desta celebración que todo o colexio conmemoraremos o vindeiro luns 30 de xaneiro. 

Concurso literario - Día das Letras Galegas

A Escola Galega de Administración Pública (EGAP) organiza un Concurso de literatura infantil e xuvenil para celebrar o Día das Letras Galegas 2023.

Pode participar alumnado de 9 a 11 anos de idade e de 12 a 14 que aspirará aos seguintes premios:

1º PREMIO: 250€

2º PREMIO: 200€

3º PREMIO: 150€

Podedes consultar as bases e a convocatoria premendo na imaxe. Animámovos a participar!

ACHÉGASE O NADAL!

Como sabedes as nenas e nenos galegos temos moita sorte! Proximamente ás nosas casas virán Papá Noel, o Apalpador e tamén os Reis.

Deixámosvos uns recursos para traballar o Apalpador, personaxe típico galego que trae xoguetes artesanais e de madeira.

Animámosvos a escribirlle a carta e tamén podedes ler a poesía inclusiva feita con pictogramas. Se algunha familia se anima a gravar a voz pode envialo ao correo do centro (ceip.opombal@edu.xunta.gal) como fixeron Xulia (4ºA), e Erea (1ºA) co seu pai Daniel (preme para escoitala)

Boas festas para todas as familias, e felices vacacións, alumnado!

Carta para o Apalpador                                                         Poesía inclusiva

No Pombal encaixamos todos.

O 3 de decembro de cada ano, celébrase o Día Internacional das Persoas con Discapacidade, establecido en 1992 pola Asemblea Xeral das Nacións Unidas, e representa unha oportunidade para reflexionar e promover as accións necesarias para garantir os dereitos e o benestar das persoas con discapacidade en todos os ámbitos da sociedade.

No cole quixemos conmemorar esta data creando entre todos este bonito paraugas.

Os cativos e as cativas de Educación Infantil decoraron as pezas con diferentes texturas: dende a terra, sementes, alimentos naturais co seu fermoso colorido, ata outros máis elaborados pero moi básicos na alimentación (fariña, pan raiado, pasta, etc.).

 

En Educación Primaria sementaron máis igualdade e respecto... 

 

 

Se pasades pola  Praza da Estrela igual o vedes por alí!

Nós xa o paseamos polas aulas do cole!